منقول من صفحة صديق لي
... من كام يوم ... واقف في الشارع بفتح عربيتي ... جالي واحد يمكن يكون ٢٦ سنه و رفيع جداً و باين عليه موظف بسيط شايل بنته علي إيده ... نفسها تنام ... بس يظهر من كتر ما كتف أبوها ناشف من الفقر مش عارفه تنام ... الراجل بصوت واطي و ماسك نفسه عشان ميعيطش قال: " معلش يا باشا انا بنتي لسه مولوده في مستشفي ابو الريش و في الحضانة و اليوم ب٨٠ جنيه و انا موظف بسيط مرتبي ٤٠٠ جنيه و نفسي البنت تعيش عشان معنديش فلوس تاني اصرفها علي دكاتره حمل و عمليات ولاده و أدوية ... انا صرفت اللي حيلتي و يا باشا باين من عربيتك انك من كبرات البلد ... فلو ممكن تكلملي حد يعفيني او يقسط ليا فلوس الحضّانه ... أكون شاكر " ... فسألته كام سؤال و كانت ردوده كلها منطقيه و معلوماته عن الحضّانه شكلها تفصيلية ... في النهايه أخدت تليفونه و صورت بطاقته بالتليفون و إديته "٢٠٠ جنيه " و أديته تليفوني و قبل ما يمشي قولتله ... الفلوس دي انا بديهالك عشان انت محتاج ... فلو سمحت لو مش محتاجها خليها عشان في ناس محتاجه غيرك ... الراجل بص في الارض و قالي ربنا عالم ... مشيت و كلمت المستشفي طلع كلامه صح ... فكلمت حد يوصي المستشفي و الراجل قال اعتبر الموضوع منتهي و قفلت التليفون و نسيت الموضوع. و من ساعه تقريبا نمره بتتصل بيا ... "ألو ... انا يا باشا الراجل اللي سعادتك إديته ال٢٠٠ جنيه ... و الحمد الله المستشفي خلاص وافقوا يخلوا الحضّانه ببلاش عشان حضرتك يا باشا وصيت عليا ... ربنا يكرمك و يزيدك ... امي نفسها تبوس إيدك و بتتشكرلك اوي ... وانا بعتذر منك اوي وبستأذنك انك تسامحني في ٤٠ جنيه صرفتهم من ال٢٠٠جنيه علي أكل بنتي الأسبوع اللي فات و تأخدمهم مني علي شهرين ... و ال١٦٠ جنيه معايا دلوقت شوف سعادتك اجيبهملك فين " .... فسألته و ترجعهم ليه !! ... فكان رده " يا باشا سعادتك قولتلي لو مش محتاجهم سيبهوم ... عشان في ناس غيرك كتير محتاجه ... وانا الحمد لله دلوقت بفضل ربنا و بحضرتك خلاص مش محتاج ... خدهم سعادتك ... أكيد هتلاقي حد يستاهل يأخذهم اكثر مني" والله العظيم دموعي نزلت مني وانا بكلمه ... باركت له علي ما جاله ... وقولت له ان الخير كتير ... و دي هديه بسيطه للبيبي الجديد.
#عن عزه النفس والكرامة أتحدث يا ساده.
أنشر الموضوع ليعلم الناس الحقائق وكن أنت الآعلام البديل
ليست هناك تعليقات:
إرسال تعليق