حق عرب في مشروع قناه السويس!

JAWDA

1 hr · 

--------------------------------------------

لدينا حق عرب عند بعض قراء جوده! منذ سنه قلنا في الاول ان السيسي يكذب عندما يقول ان المشروع مصري ١٠٠٪. ثبت كلامنا ١٠٠٪.

ماكنش رجما بالغيب. كان فقط استعراض لقدرات مصر علي التنفيذ و بناء علي أعلام الشركات الاماراتيه انها ستنفذ المشروع حتي قبل ان يعلن السيسي نفسه عن المشروع!

مش مصدقنا. ارجع لمصدر ١.

قلنا في الثانيه ان كلام محلب و السيسي ان المشروع سيزيد عوايد القناه بمقدار ٢٥٩٪ هو كلام همبكه. و حسبنا افضل عايد ممكن لو كل كلامهم أتحقق بناء علي دراسه هندسيه لاستيعاب القناه الحالي و حركه النقل العالمي. و قلنا ان افضل عايد ممكن هو ٢٥٪ علي احسن الفروض.

و طبعا تراجعوا كلهم عن كلامهم و بقوا دلوقتي بيقولوا مليار جنيه في السنه. يعني نصرف ٨٠ مليار عشان يطلع مليار في السنه! مشروع في منتهي الفشل.

طبعا البعض هاجمنا و قالوا يا مش وطنيين. يا وحشين. أمشوا علي تركيا و لا قطر. الخ.

و مش مصدقنا ارجع للمصدر التاني. و عايزين نشوف اللي شتمونا بيقولوا ايه عن تراجع مميش و مفيش عن كلامهم.

و بعدين دخلنا علي الكذبه التالته و هي أصل الموضوع. و كان من سنه و لحد دلوقتي المصريين فاكرين ان الاستثمار الاماراتي هدفه رفع مستوي مصر. و أثبتنا في الكذبه التالته بالوثائق ان هدف الامارات في الحقيقه هو القضاء علي مشروع د هشام قنديل لتطوير قناه السويس لتنافس جبل علي حتي يظل جبل علي المينا الرئيسي في الشرق الأوسط.

اتشتمنا لما اتهرينا. اللي قال يا كدابين. المحور اللوجيستي حيشتغل. معلش ممكن حد يقولنا فين المحور ده؟ مفيش غير طريق المحور الحقيقه.

و بعدين دخلنا في الحفر علي الناشف و أثبتنا انه مش اختراع جديد زي ما السيسي حب يقول. بالعكس كل تفريعات القناه قبل كده اتحفرت علي الناشف الاول و بعدين بكراكات.

الكلام ده من سنه. و طبعا هجوم علينا. انتم ايش فهمكم. و طبعا انتهي الموضوع انه بدأ بحفر علي الناشف و بعدين كراكات. بالضبط زي ما قولنا.

مش مصدق ارجع للمصدر ٤.

و في الخامسه قلنا ان المستفيد الحقيقي من مشروع التفريعه هي شركات الحفر الاماراتيه اللي كانت عاوزه تعمل مشروع قناه العرب في دبي و ان المشروع ده ملقاش تمويل في الامارات و بالتالي الشركات دي مكنتش لاقيه شغل. و طبعا اتهمونا بالعماله. و دلوقتي الشركات الاماراتيه اللي عملت أرباح قياسيه من الفلوس اللي الجيش أخدها من السعوديه و من اللي الجيش كان محوشه و من فلوس المصريين الغلابه، الشركات دي يتعمل دلوقتي إعلانات في الجرايد بتشكر السيسي. طبعا لازم يشكروه.

مش مصدق اننا قلنا ده من سنه. ارجع للمصدر ٥.

و في السادسه قلنا ان هذا مشروع غير مدروس. و طبعا الان طلع السيد ساويرس و قال نفس الكلام. بعد لما قلناه بسنه. مش مصدقنا. اقرأ كلامنا في المصدر ٦ و كلام ساويرس في مصدر ٧.

و في السابعه قلنا ان هذا مشروع لن يفعل شيئ لمشاكل مصر الاقتصاديه. ارجع للمصدر ٨.

بالعكس قلنا انه في ظرف ٣-٥ سنين ان هذا المشروع سيزيد الدين في مصر و سيزيد التضخم و ارتفاع الاسعار و سيبطئ النمو الاقتصادي المصري. ارجع للمصدر ٩ عشان تشوف اللي قلناه من سنه. يارب تصدقونا المره دي. و الله المسائل دي بالعلم و الحسابات مش بالكفته و البلطجه.

اللهم بلغنا. اللهم فاشهد.

المصادر:
--------
١- الكذبه الاولي: المشروع مصري ١٠٠٪
http://jawdablog.org/2014/09/14/suez_canal_1st_lie/

٢- الكذبه الثانيه: عوايد قناه السويس ستزيد بمقدار ٢٥٩٪
http://jawdablog.org/2014/09/14/suez_canal_2nd_lie/

٣- الكذبه الثالثه: الاستثمار الاماراتي سيغير الحياه في مصر
http://jawdablog.org/2014/09/14/suez_canal_3rd_lie/

٤- الكذبه الرابعه. الحفر علي الناشف:
http://jawdablog.org/2014/09/14/suez_canal_4th_lie/

٥- الكذبه الخامسه: من المستفيد من المشروع
http://jawdablog.org/2014/09/14/suez_canal_5th_lie/

٦- الكذبه السادسه: المشروع مدروس بعنايه.
http://jawdablog.org/2014/09/14/suez_canal_6th_lie/

٧- تصريحات ساويرس انه لن يستثمر في مشروع القناه لانه غير مدروس:
https://www.youtube.com/watch?v=sCq89-f9KV4

٨- الكذبه السابعه: المشروع سيحل مشاكل مصر الاقتصاديه
http://jawdablog.org/2014/09/14/suez_canal_7th_lie/

٩- توقعات التأثيرات الاقتصاديه المقبله لمشروع تفريعه السويس
http://jawdablog.org/…/suez_canal_certificates_jawda_analy…/

نرحب دائماً بالنقاشات المجدية والتعليقات التي تغني موضوعاتها
 ،أنشر الموضوع ليعلم الناس الحقائق وكن أنت الآعلام البديل