شاركنا رأيك

شاركنا رأيك

صفحات مخفيه من تاريخ مصر سايكس-بيكو و الحرب العالميه الاولي من هو سايكس؟ الحلقه ١٢


JAWDA added a new photo to the album: ‎صفحات مخفيه من تاريخ مصر‎.

----------------
في نوفمبر ١٩١٥ و بعد سنه من بدايه الحرب الأوضاع علي الجبهات كلها كانت تماماً غير المتوقع. في جاليبولي بالقرب من اسطنبول كان الانزال البحري البريطاني ضد العثمانيين فاشل جدا و مات فيه ميات الآلاف من الجنود من غير ما الخطوط تتحرك متر واحد. و كان البريطانيون ابتدوا فعلا يفكروا ان مفيش حل غير انهم ينسحبوا من شبه جزيره جاليبولي و من محاوله الهزيمه السريعه للدوله العثمانيه.
زي ما شفنا في الحلقات السابقه (مصدر ١)، كانت معاناه الأرمن في الأناضول و تهجيرهم في أتجاه سوريا في قمتها. و كمان شفنا قبل كده ان جمال باشا حاكم سوريا التركي اكتشف مؤامره الليبراليين السوريين ضده من الوثائق اللي لقاها في القنصلية الفرنسيه في بيروت. و عرفنا ان جمال باشا رفض يقبض علي الناس دي عشان كان خايف انه العرب في سوريا يثوروا ضده و ينضموا مع إنزال بحري بريطاني في سوريا. لكن مع هزيمه البريطانيين في جاليبولي بدا واضح انهم مش في موقع يعملوا أنزال في سوريا و بالتالي أتحرك جمال باشا ضد الشخصيات الليبرالية دي و قبض عليهم.
في نفس الوقت كانت المعارك في الجبهه الغربيه علي الحدود بين فرنسا و المانيا برضه في حاله محلك سر. الخطوط بينهم بيموت فيها ميات الآلاف برضه لكن من غير ما يحصل اي حركه. الحقيقه اختراع الخنادق الحربيه و المدفع الرشاش خلي الخسائر في الأرواح عاليه جدا من غير ما تحصل حركه فعليه في المعارك قبل اختراع الدبابه و الطياره لاحقا. من غير الدبابه مينفعش يحصل اختراق سريع لخطوط عدو معاه مدفع رشاش.
يمكن النصر الوحيد اللي حصل في المعارك كان ان القوات الهنديه البريطانيه قدرت انها تعمل تقدم في نوفمبر ١٩١٥ علي نهر دجله بعد معركه الكوت و انها تتقدم في أتجاه بغداد. طبعا تاثير ده الاستراتيجي محدود جدا لان بغداد تبعد الف ميل عن اسطنبول و تعتبر منطقه معزوله عن روح الامبراطورية العثمانيه في تركيا و سوريا.
في الحلقه قبل اللي فاتت شفنا ان محمد الفاروقي هرب علي الخطوط البريطانيه في جاليبولي و قالهم علي التنسيق بين الضباط العرب في الجيش التركي و الشريف حسين في مكه. و دي زي ما شفنا كانت نقطه التحول في الموقف البريطاني من الشريف حسين لأنهم فهموا دلوقتي انه معاه قوه حقيقيه تتمثل في الضباط العرب دول. و بالتالي سير ماكماهون المندوب السامي البريطاني في القاهره بعت للشريف حسين يقوله ان بريطانيا موافقه علي شروطه لتكوين دوله عربيه بقيادته في مقابل تمرد الشريف حسين ضد الأتراك و ده بعد صمت طويل من البريطانيين نتيجه انهم في الاول و من غير الضباط العرب كانوا شايفين ان حسين راجل مهرج يعني و دون وزن و بيطلب طلبات اكبر من امكانياته بكتير.
في ٥ نوفمبر ١٩١٥ جه رد الشريف حسين من مكه للبريطانيين في القاهره و انه موافق علي طلبات بريطانيا. و بكده حصل اتفاق عريض بين بريطانيا و حاكم عربي للتمرد ضد الأتراك.
مش بس جاليبولي و الجبهه الغربيه كانت محلك سر. روسيا حاولت اقتحام الامبراطورية النمساوية و الرد جه من المانيا ضد روسيا ذاتها. و بالتالي انتصار روسيا ضد النمساويين عادله انتصار المانيا ضد روسيا في الجبهه الشرقيه. و كمان في نوفمبر ١٩١٥ أيطاليا حاولت تقتحم النمسا المهزومه خمس مرات في جبهه البندقية - فيينا و فشلت في الخمس مرات و فقدت ٦٠٠ الف جندي!
الغريب انه بالرغم من كل الخسائر دي و عدم تحقيق اي تقدم، بدل ما الاطراف المتحاربة تسعي للسلام و التسويه بالعكس قرروا كلهم الاستمرار في الحرب و محاوله تعويض الخسائر انهم يدوروا علي انتصار! بالضبط زي المقامر اللي كل لما يخسر كل لما يبقي عاوز يلعب تاني و يقامر بفلوس أكتر.
(تعليق جوده: بالمناسبه ده احد اهم اسرار نجاح الولايات المتحده كقوه عظمي. امريكا عندما تري مشروع خاسر تتركه. فيتنام مثال. العراق و الشرق الاوسط مثال تاني. لا تكرر ذات الأخطاء في ذات المكان و لا ترفع من المقامره. المساله فقط مسأله ربح و خساره دون تدخل للمشاعر الوطنيه في الموضوع).
لذلك بقت طلبات السلام عاليه جدا. بقت مش بس تحقيق الأهداف من الحرب. لا. دي بقت كمان استسلام كامل للعدو و انه يدفع تكاليف الحرب كلها حتي وقتها!
لكن المشكله بقت انهم كمان شايفين العدو و شايفين انه بمرور الوقت العدو كمان مبقتش حيلته حاجه. العدو كمان عمال يخسر جنود و يخسر معدات و يخسر ثروات. و بالتالي مش حيقدر يعوض كل متطلبات ما بعد الحرب. فين تلاقي بريطانيا و فرنسا و روسيا المتحالفين مع بعض في الحرب، فين يلاقوا حد يقدر يلبي متطلبات الثروه و يدفع فواتير الحرب؟ مفيش غير الدوله العثمانيه! دوله ممتده من بغداد لإسطنبول وعندهم شعوب ضخمه و ثروات غير مستغله. لذلك في نوفمبر ١٩١٥ اطلق الحلفاء علي الدوله العثمانيه اسم "النهب الكبير" the great loot (مصدر ٢).
بالنسبه لبريطانيا و فرنسا و روسيا الحرب قد الشرق الاوسط بقت حرب عشان الاستعمار. عشان ياخدوا الأرض من العثمانيين و ينهبوها!
قيصر روسيا بقاله ٢٠٠ سنه عاوز اسطنبول. فرنسا عاوزه سوريا بحكم علاقات طويله مع الموارنه في لبنان. و بريطانيا عاوزه العراق و ثروات بترول فيه كانت في بداياتها و اليمن و قربه من جوهره التاج في الهند.
طبعا كان في كمان العامل الديني. كل الدول دي دول مسيحيه و بعضهم كان يكره حقيقه انهزامهم في الحروب الصليبيه من ٦٠٠ سنه. و بالتالي دي كانت فرصه إنهاء الحروب الصليبيه بشكل مختلف.
اللي خلي احتمال الاستيلاء علي الاراضي العربيه ممكن و فتح عيون الدول دي علي النهب الكبير كانت طبعا المفاوضات السريه بين الشريف حسين و هنري ماكماهون. لان من غيرها مفيش امكانيه ان الإنجليز يخترقوا الدوله العثمانيه.
مع أواخر نوفمبر ١٩١٥ فرنسا عن طريق مخابراتها عرفت ان في مفاوضات سريه بين بريطانيا و حسين. و روسيا كمان دخلت في الخط. و الاتنين قدموا لبريطانيا مذكره رسميه بطلباتهم في الدوله العثمانيه!
بريطانيا طبعا كانت حاسه بكل ده من أوائل اكتوبر من وقت رد ماكماهون علي الشريف حسين. و بالتالي طلبت الحكومه البريطانيه و علي رأسها لورد كتشنر وزير الحربيه البريطاني (و حاكم مصر سابقا) من دبلوماسي اسمه مارك سايكس انه يرأس لجنه تقصي حقائق في الشرق الاوسط و يتفاوض مع الحلفاء علي كيفيه تقسيم الشرق الاوسط في عالم ما بعد الحرب.
في ١٧ نوفمبر ١٩١٥ وصل مارك سايكس القاهره لتقصي "الحقائق". اسمه بالكامل سير تاتون بينفينوتو مارك سايكس. البارون السادس لسليدمير.
مارك سايكس كان بيطلق عليه لقب هاوي. بمعني انه بيمارس السياسه مش لانه محتاج فلوس. بالعكس ده كان عيب وقتها. كان بيمارس سياسه لانه كان بيحب السياسه. زي زي كتير من الأرستقراطيين البريطانيين. سير مارك بيملك مقاطعه مساحتها ٣٠ الف فدان في يوركشاير في إنجلترا. اتعلَّم في كامبريدج. سافر كتير في أنحاء الدوله العثمانيه. الف ٤ كتب. حارب في حرب البوير ضد الروس مع الأتراك. كان قنصل شرفي في القنصلية البريطانيه في اسطنبول. متزوج. عنده ٥ أطفال. منتظر السادس. عضو في البرلمان البريطاني. اخترع البروجيكتور overhead projector. كاثوليكي محافظ. و كل ده و عمره بس ٣٦ سنه.
(لا توجد علاقه حقيقيه بين مارك سايكس و اليهوديه. هو فقط أحب الصهيونيه كمبدأ و ككاثوليكي مسيحي محافظ امن بحق اليهود. لكن مفيش علاقه نسب او قرابه. بالعكس هو بدأ حياته بيكره اليهود لأنهم قتلوا المسيح. و للاسف المصريين بيشوفوا يهودي في كل شيئ. و ده جزء من لعبه المخابرات المصريه معاهم. لانه المصريين عندهم عقده نقص كبيره تجاه اليهود. و بالتالي المخابرات عاوزه تعدي اي حاجه تقول اليهود ورآها عشان يداروا فشلهم. اليهود ورا سد النهضه لذلك اوعي تفتح بقك و مينفعش نعمل حاجه ضد السد. و هو كلام غير صحيح و أثبتناه في السابق. مصدر ٣. و هي لعبه تتكرر حتي اصبحت سذاجه ان يصدقها المصريون. مع انه اسرائيل هي اكبر صديق لنظامي مبارك و السيسي و هي المدافع الاول و الأكبر عن نظام السيسي في كل مكان في العالم - مصدر ٤).
سايكس كعاده الطبقه الأرستقراطية وقتها في بريطانيا كان مغرور جدا. و كان حاسس ان بريطانيا لها وضع خاص ممنوح من الله انها تنشر الحضاره في العالم.
الراجل كمان كان قادر انه يلخص مواضيع معقده في كبسولات صغيره جدا و موجزه بحيث انها تبدو منطقيه جدا. الراجل اخترع الساوند بايت للأخبار الاميريكيه (التصريحات الموجزه للساسه الأميريكيين التي يسهل علي الاعلام انه يرددها طول اليوم). بالرغم انها للمتخصص يتضح انه كلام فارغ. لكن غير المتخصص يقرا كلامه و ينبهر به.
سايكس كتب في مذكراته (مصدر ٥) تشريح للمجتمع العربي و المصري. تعالوا نشوف قال ايه:
المجتمع العربي ينقسم لقسمين: الناس القدماء ancient و المودرن moderns. و هو يقصد بالقدماء المحافظين او ما يطلق عليه اليوم التقليديين او الإسلاميين مثلا. و بعدين جوه كل قسم شرح وجود ٣ مجموعات : هو سماهم class 1،2, 3. الدرجه الاولي و التانيه و التالته وفقا لمستوي تعليمهم. مفهوم طبقي جدا للوضع في الشرق الاوسط منبعث من تجربه بريطانيا مع وجود طبقات في وقتها. غرور طبعا.
بيقول عن الدرجه الاولي من فئه المحافظين او التقليدين او الإسلاميين انهم الناس المتزمتين جدا دينيا و رافضين التقاليد الغربيه او ما يطلق عليهم اليوم أصوليين. بيقول ان دول خدوا تعليم إسلامي اصولي.
بيقول عن الدرجه الاولي من الناس المودرن او المتغربين انهم أخدوا تعليم غربي و انهم متغربين تماماً في تعليمهم و كل تصرفاتهم.
بيقول ان الدرجه التانيه من الناس المودرن انهم خدوا تعليم غربي بس مش كفايه. و بكده انت تفهم الدرجه التالته من المودرن انهم خدوا تعليم غربي قليل جدا بس عاوزين القيم الغربيه. و هكذا. خد بالك تصنيف وفق التعليم مش اي حاجه تانيه.
سايكس راح بعد كده يصنف مين من الست طبقات دول المفروض بريطانيا تعمل علاقات معاه. بيقول ان في بلد زي مصر كل التلات طبقات من الناس التقليدين او الإسلاميين او المحافظين، كلهم علي عداء مع بريطانيا و مستحيل تبقي في علاقه كويسه معاهم. بيقول ان الدرجه الاولي من المحافظين عندها عداء شديد. التانيه عندها تحفظ شديد. التالته ممكن تتقبل الغرب علي مضض.
العجيب بقي هو اللي قاله عن الناس المودرن. بيقول ان الطبقه الاولي و التانيه من المودرن مش ممكن يتوافقوا مع الغرب! مع ان تعليمهم غربي. تخيل. لكن سايكس بيقول ان مطالبهم ضخمه جدا من الغرب. عاوزين دساتير و حريات لذلك حيعادوا بريطانيا. و ان الأفضل هم الطبقه التالته في المودرن! تخيل. الأقل تعليما هم الأفضل. لأنهم عاوزين الغرب بس مش فاهمين كل القواعد.
العجيب ان ده يفهمنا لحد دلوقتي ليه الجيش هو الحقيقه موقع الطبقه التالته من الناس المودرن. تعليم غربي بس سيئ جدا. و عدم فهم لكيف يعمل الغرب. لكن هم دول اللي بيحكمونا. من الحلقات اللي فاتت شفنا ان تحالف الضباط مع الشريف حسين و امثاله زي ال سعود مهم جدا. ليه الضباط دول بيبقوا من الفئه التالته في مجموعه المودرن! ليه فيه عداء للاسلاميين برضه لان الإسلاميين بيعادوا الغرب في الدول العربيه، عكس تركيا او ماليزيا مثلا او حتي الهند او باكستان.
في نفس الوقت ده كان جمال باشا طلب من كورت بروفر انه يندمج في المجتمع السوري و يشوف استعداد المجتمع للثوره ضد الأتراك بالذات استعداد الأقليات الدينيه. كورت بروفر كان بيتكلم عربي بطلاقه. كورت في اخر ١٩١٥ كتب في تقريره الاتي:
بالرغم ان المسيحين بيفضلوا حد تاني يحكمهم و معظمهم متعاطفين جدا مع البريطانيين و عاوزينهم يدخلوا سوريا، الا انهم جبناء و لن يثوروا. بالحرف (مصدر ٦) قال: "ان رغبتهم في الخيانه يفوقها بشده جبن عن تحقيق امالهم"
نفس الكلام قاله عن اليهود و قال انه بالرغم ان الصهاينه بيتظاهروا انهم عاوزين بس اليهود يعيشوا في فلسطين تحت حكم الأتراك الا ان الهدف الحقيقي هو اقامه دوله يهوديه. بس بروفر قال انهم مش حيتحركوا الا لو بريطانيا دخلت فلسطين.
بروفر كتب عن المسلمين في سوريا انهم وطنيون و متدينون جدا و بيناصروا الدوله العثمانيه بشده. و ان لو قام انقلاب عسكري او ثوره ضد تركيا التأييد لها حيكون محدود جدا. عكس تماماً كل اللي كتب التاريخ العربي بتقوله ان الشعب السوري كان يرزخ تحت الاحتلال التركي الخ.
بروفر قال انه لو بريطانيا دخلت سوريا الوضع حيتغير و انها حتلاقي عملاء في سوريا يتعاونوا معاها. ممكن مش كتير لكن كفايه. بروفر كتب قايمه برجال اعمال كبار مسلمين و مسيحيين المفروض ان جمال باشا يقبض عليهم لأنهم حيتعاونوا مع بريطانيا في حاله دخولها سوريا.
السفاره الالمانيه قلقت جدا من القائمه دي. لانه معناها قمع جديد في سوريا خصوصا بعد لما جمال باشا اعدم الليبراليين المتعاونين مع فرنسا في ميدان عام في بيروت.
لاحظ وضع مشابه جدا لوضع د مرسي مع رجال الاعمال المتعاونين مع الانقلاب و تفكر.
طبعا القرار وقتها برضه انه مفيش داعي.
و نكمل.
المصادر:
--------
١- الحلقات السابقه مجمعه من صفحات مخفيه من تاريخ مصر:
https://jawdablog.org/…/%D8%B5%D9%81%D8%AD%D8%A7%D8%AA-%D9…/
٢- لورانس في بلاد العرب:
https://play.google.com/store/books/details…
٣- الحقائق وراء سد النهضه:
https://jawdablog.org/2014/09/30/water_issue_1/
٤- علاقه سايكس باليهودية
https://www.jstor.org/stable/29780150…
See Translation
نرحب دائماً بالنقاشات المجدية والتعليقات التي تغني موضوعاتها ،
أنشر الموضوع ليعلم الناس الحقائق وكن أنت الآعلام البديل
في

ليست هناك تعليقات:

إرسال تعليق

الاشتراك في: تعليقات الرسالة (Atom)