سواء كنت شايف اللي حاصل و بيحصل ده انقلاب او شايفه ثورة
بمناسبة الايام المفترجة دي لازم كلنا نتفق على حاجة مهمة
ان لو دي ثورة لمصلحتنا او انقلاب ضد مصلحتنا في الاخر كلنا بنعيش في وطن واحد و كلنا هنستفاد او هانتضر مع بعض
كلنا بيتقال عليه في الاخر مواطن مصري و هاتتنسي خروف و هاتتنسي عبد بيادة
اختلافنا سوا مش هايفيدنا كلنا بالعكس كل واحد هايفضل في جزيرة لوحده و في عزلة عن الآخر
خلونا نحاول نختلف مع بعض على حب زي ما دينا علمنا
خلي كل واحد فينا يبدأ بخطوة ايجابية
شوف كام واحد خسرك او خسرته بسبب كلام في السياسة و ماحدش مننا متأكد تماما ان هو اللي اصح من الاخر
خلونا نفكر شوية مين اكتر واحد مستفيد من خصامنا و نقارنا و فرقتنا
عدونا جوه او بره
مين مستعد ياخد ثواب انه يرجع علاقته مع حد علاقته اتقطعت معاه بسبب السياسة
ما احنا لو كل واحد اختلفنا معاه في الاخر كل واحد هايعيش لوحده
طيب فين حق الصديق على صديقه فأنه لو حاسس انه ماشي في سكة غلط يوجهه للطريق الصح بالحسنى و بالحب؟
طيب لما نشتم بعض و نعاير بعض هانكسب ايه غير المزيد من الكراهية ضد بعض
طب برضه مين اكتر حد مستفاد
عدونا جوه او بره برضه
ده الوقت اللي كل واحد يقدر يرجع بيه صداقة اتقطعت بسبب كلمة اتقالت في ساعت انفعال او حماسة
ايام مفترجة و ماينفعش نخسر بعض فيها
بلدنا في محنة و ماينفعش نواجهها و احنا كل واحد مدي ضهره للتاني
يللا مستني ايه !
اجري على التليفون و كلمه او كلميها
عاوزين العيد يعدي و كل واحد معاه اصحابه اللي كانوا معاه قبل 30
يوليو سواء كانت ثورة او انقلاب
كل سنه وانتم طيبين انشر ليعم الفرح والبهجه
ليست هناك تعليقات:
إرسال تعليق