شاركنا رأيك

شاركنا رأيك

كيفية عمل الإقامة في تركيا

هشام عاصم
July 29Edited
 . . .
هنتكلم بالتفصيل دلوقتي ازاي تعمل إقامة سياحية بنفسك ومن غير اي مشاكل بإذن الله , خد نفس عميق , واستعد لقراءة البوست الطويل فوق العادة ده
================================
الاول نجاوب علي بعض الأسئلة :
- يعني ايه اقامة سياحي ؟
- يعني بتكون مقيم في تركيا بشكل رسمي لمدة سنة – قابلة للتجديد – وليك الحق في الدخول والخروج من تركيا اي عدد من المرات , ومن غير ما تحتاج تاشيرة او تصريح امني , بس لو سبت تركيا اكتر من 4 شهور بتتسحب منك الاقامة
- طب يحق ليا الشغل لو معايا الإقامة السياحي ؟
- القانون بيقول لأ , بس الواقع ان محدش بيسأل , وأغلب المصريين اللي شغالين هنا معاهم إقامة سياحي
- طب سهل اجددها ؟ ولمدة كام سنة ؟
- ايوة ممكن تجددها كل سنة , ولعدد مفتوح من السنوات
- هعرف اخد الجنسية بالاقامة السياحي ؟
- لأ , الاقامة السياحي مش بتدي الجنسية ابدا
- طب فيه انواع اقامات تانية غير السياحي ؟
- ايوة فيه انواع تانية زي :
o الاقامة الإنسانية :
https://goo.gl/g6cF0H
o إقامة المستثمر :
http://on.fb.me/1FS5WgW
o إقامة العمل :
http://on.fb.me/1FmqErk
o الإقامة السياحية اللي هنتكلم عليها دلوقتي
================================
اهو شرط لعمل الإقامة السياحية , انك تقدم عليها قبل ما يتم كسر تاشيرتك , يعني لو تاشيرتك لمدة شهر , فلازم تقدم عليها قبل مرور 30 يوم من دخولك تركيا , احيانا بيكون فيه فترة سماح بس محدش يضمن
وطبعا متجيش في اخر يوم من ال30 يوم وتقدم , لان احيانا بيكون الموقع مهنج او بطئ فمتلحقش , ياريت تقدم من تاني يوم تيجي فيه تركيا علي طول
الورق المطلوب لعمل الإقامة السياحية هو :
1. جواز سفر صالح لمدة سنة علي الأقل
2. تأمين صحي
3. صور شخصية
4. ورقة اللقب من السفارة
5. ورقة الحساب البنكي ( ممكن لا يتم طلبها )
6. عقد الإيجار ( ممكن لا يتم طلبه )
7. ورقة العدلية ( ممكن لا يتم طلبه )
================================
1 ) يكون معاك جواز السفر الخاص بيك , وتصوره , وتصور الصفحة بتاعت الفيزا , ولو كان ختم دخول تركيا مش في نفس صفحة الفيزا تصور ختم الدخول
================================
2 ) بالنسبة للتأمين الصحي , فبيتم عمله من إحدي شركات التامين الصحي في تركيا , وبيتم تحديد السعر بناء علي السن , وديه اسعار التامين الصحي في 2014 , و هتلاقي اسعار 2015 قريبة منها
http://on.fb.me/1HfgB5t
وممكن تعمله لوحدك عن طريق انك تروح لاي مكتب محترم في اكسراي او الفاتح وتعمله فورا
والتامين الصحي بيتيح لك مجموعة من المستشفيات تكشف فيها باسعار مخفضة , وكمان بيعمل تخفيض في حالة وجود اي عملية جراحية لا قدر الله
================================
3 ) الصور الشخصية , مطلوب 5 صور شخصية بخلفية بيضاء , ولو رحت اي استوديو في منطقة الفاتح وقلتله "فوتو ايكاميت" هيفهمك
================================
4 ) ورقة اللقب , هي عبارة عن ورقة بتطلع من القنصلية المصرية في اسطنبول اللي في منطقة بيبيك , وبيكون فيها اسمك بالكامل واسم العائلة
حضرتك بتروح القنصلية اللي في المكان ده
http://bit.ly/1I1itzQ
عن طريق انك تاخد الترام اتجاه كاباتاش وتركب
22 , 22RE , 25E
او من تقسيم وتركب
40 , 40T , 42T
وتنزل محطة بيبيك , وترجع بضهرك 50 متر وهتلاقي القنصلية علي البوسفور
روح اي يوم من الاتنين للجمعة , من الساعة 10 الصبح ل 2 الضهر , متقفش علي الشباك , قول انك مصري وعايز ورقة اللقب , وجوة القنصلية قدم عليها ب 55 ليرة والمفروض تستلمها في نفس اليوم الا لو عليهم ضغط
================================
5 ) بالنسبة لورقة الحساب البنكي
اولا هي مش إجباري في الاقامة , يعني ممكن ميطلبهاش وفيه ناس عملت الاقامة ومسالهاش عليها , وفيه ناس تانية راحو وسالها عليها
فرأيي انك متعملهاش في الاول , وروح الراندفو من غيرها , ولو سالك عليها هيحددلك مهلة اسبوعين عشان تعرف تعملها
كان قبل كدة في النظام القديم بيقبلوا ورقة من الصرافة انك غيرت 6000 دولار , بس دلوقتي مبقوش يقبلوها لما عرفوا ان اي حد بيضربها بسهولة
طب ورقة الحساب البنكي اعملها ازاي ؟
اولا اعمل حساب بنكي في بنك كويت ترك , زي ما البوست ده موضح
http://on.fb.me/1Sjw2lO
بعدها شوف حد يثق فيك , يروح معاك البنك ويحطلك المبلغ في الحساب بتعاك , وتطلع الورقة في نفس اللحظة , قول للموظف في البنك عايز
Hesap Ekstresi Ikamet
هيفهمك , وهيديلك ورقة باجمالي الحساب بتاعك
لو ملقيتش اي حد يثق فيك ويديلك الفلوس , شوف بقي لو فيه مكاتب او حد يعملهالك وطبعا هياخد منك رسوم
================================
6 ) عقد الإيجار برضه من الحاجات اللي كانت مطلوبة في النظام القديم , ودلوقتي ممكن متتطلبش , وبيكون عن طريق ان يكون اسم صاحب الإقامة مكتوب في عقد شقة رسمي , ويكون العقد متوثق في النوتير , واحيانا الموظف في الاقامة بيطلب الطابو ( اللي هو عقد ملكية الراجل التركي اللي مأجرلك الشقة ) عشان يتاكد ان العقد حقيقي
ولو عايز تعمل لمراتك اقامة , يبقي من الاول اكتب اسمك واسم المدام في عقد الايجار , عشان تقدي هي تستخدمه في الاقامة بسهولة
برضه لو العقد مش متاح معاك , روح من غيره , ولو سأل عليه حاول تعمله لو شوف لو فيه حد بيعملهولك بالفلوس
================================
7 ) ورقة العدلية , هي ورقة بتجبيها من المحكمة التركية في باكيركوي , هتروح عند محطة مترو باكركوي , تطلع من المترو تمشي شمال في شمال حتلاقي مبنى كبير واضح أدخل وامشي مع السور متدخلش المبنى اللي في وشك لحد آخر السور وحتدخل شمال عند السجل , قدم الباسبور بتاعك وقول عايز :
adeli secil belgisi
وهتاخدها وانت واقف , وبرضه نأكد ان الورقة ديه مش بتطلب دايما
================================
اما لو عندك اولاد تحت الـ 18 سنة , فهات شهادات ميلادهم , وترجمها ووثقها , وخليها معاك في المقابلة ,وطبعا جواز سفر الاب والام وصورهم , وتكون جايب صور للأولاد , ومش مطلوب ليهم تامين صحي او ورقة عدلية او ورقة لقب او شهادة بنك
================================
كدة احنا اتكلمنا عن الورق المطلوب , وهنبدأ دلوقتي في الكلام التفصيلي عن عمل الاقامة
زي ما قلنا , عشان الاقامة تكون مظبوطة , لازم تقدم عليها قبل ما يمر 30 يوم من دخولك تركيا , والتقديم بيكون عن طريقة موقعهم الرسمي ده
https://e-ikamet.goc.gov.tr/
اول ما تدخل هتلاقي زرار علي اليمين الخاص بتجديد الإقامة , وعلي الشمال الخاص بالإقامة الجديدة , اختار اللي علي الشمال , زي الصورة ديه
بعدها هيجيبلك صفحة طويلة عن القوانين بتاعتهم , انزل تحت واعمل اختبار الحروف ودوس علي الزرار , زي الصورة
هيظهر لك شاشة فيها اربع انواع من الاقامات , الاقامة القصيرة , الطويلة , الاسرة , الطالب , هنختار الاقامة القصيرة اللي هو الزرار اللي علي الشمال خالص
Short Term
زي الصورة ديه
هنا بقي نيجي لاهم شاشة عندنا في الموقع , نبدا ندخل البيانات , وهنبدأ نشرحها واحدة واحدة بداية من فوق علي الشمال , زي ما موجود في الصورة ديه
وخد بالك ان هتلاقي فيه خانات مكتوب عنوانها باللون الاسود , وديه معناها ان ممكن تسيبها فاضية مفيش مشاكل , وفيه خانات باللون الأحمر وديه لازم تتملي
----------------------------------------------
Foreigner ID Number
سيبها فاضية
----------------------------------------------
Name
اكتب اسمك الاول
----------------------------------------------
Surname
اكتب اسمك الاخير
----------------------------------------------
Former Surname
اكتب اسمك الاخير تاني
----------------------------------------------
Father Name
اكتب اسم الاب
----------------------------------------------
Mother Name
اسم الام
----------------------------------------------
Gender
اختار انت ذكر ولا انثي ولا غير معلوم smile emoticon
----------------------------------------------
Date of Birth
تاريخ ميلادك , متكتبهوش , دوس علي الايكونة علي اليمين واختار التاريخ
----------------------------------------------
Marital Status
الحالة الاجتماعية , والاختيارات كالتالي
غير معلوم unknown
اعزب sinlgle
متزوج married
مطلق divorced
ارمل widow
نعيش معا living together
منفصلين living separately
----------------------------------------------
ID Number of Nationality
رقم جواز السفر
----------------------------------------------
Nationality
الجنسية , وفي المساحة اللي قدامها تكتب
Egypt
----------------------------------------------
Other Nationality
لو بعد الشر يعني بعد الشر معاك جنسية تانية , لو مش معاك سيبها فاضية
----------------------------------------------
Nationality in Born
جنسية الميلاد , اختار برضه
Egypt
----------------------------------------------
Place of Birth
مكان الميلاد , اكتب الدولة اللي اتولدت فيها
----------------------------------------------
Born Country
دولة الميلاد , نفس الموضوع
----------------------------------------------
Blood Group
فصيلة الدم ولو مش عارفها اختار اي حاجة مش فارقة
وقبل ما تمشي , دوس علي زرار
Choose photo
واختار صورة شخصية ليك
================================
ندخل علي الجزء اللي بعده في نفس الصفحة واللي موجود في الصورة ديه
----------------------------------------------
Type of Document
نوع الوثيقة , افتح القايمة واختار اول عنصر
Ordinary Passport
----------------------------------------------
Date of Issue
تاريخ اصدار جواز السفر , افتح الايكون وحدد تاريخ الاصدار
----------------------------------------------
Date of Validity
تاريخ انتهار جواز السفر , نفس الموضوع
----------------------------------------------
Number of Document
رقم جواز السفر , اكبته
----------------------------------------------
Granting Country
يعني بيسالك الدولة اللي عملت منها الباسبور , فاختار
Egypt
----------------------------------------------
Granting Authority
يعني ايه السلطة او الجهة اللي عملت منها الباسبور , فاكتب وزارة الداخلية
MINISTRY OF INTERIOR
----------------------------------------------
الخانة اللي بعدها المكتوب فيها
Kinship of the person applying on behalf of foreigner
بتختارها لو انك بتعمل الراندفو لحد تاني , فلو انت بتعمله لاولادك , اختار الاختيار التاني
Parent
اما لو بتعمله لنفسك سيبها فاضية متختارش حاجة
================================
ندخل بعدها علي المربع اللي بعده , اللي في الصورة ديه
http://on.fb.me/1SNizQr
هنا هتكتب عنوانك في مصر
----------------------------------------------
Country
اكتب اسم بلدك . اختار علي طول
Egypt
----------------------------------------------
City
اكتب اسم المدينة اللي انت منها في مصر
----------------------------------------------
Postal Code
الرقم البريدي ليك في مصر , ولو مش عارفه سيبه عشان زي ما قلنا لونه اسود
----------------------------------------------
Full Address
عنوانك في مصر , واكتبه زي ما هو في الباسبور
----------------------------------------------
Phone 1
تليفونك في مصر
----------------------------------------------
Phone 2
تليفون تاني في مصر
----------------------------------------------
E-mail
ايميلك
===============================
الخانة اللي بعدها خاصة بعملك او دراستك في مصر , زي ما موجود في الصورة
http://on.fb.me/1DPCpUk
----------------------------------------------
اول خانة اسمها
Status
تكتب فيها انت شغال ولا بتدرس ولا ايه , و هي كالتالي
موظف Employee
صاحب عمل Employer
طالب Student
أخر Other
----------------------------------------------
The Place of Work/Education
مكان الدراسة او العمل
----------------------------------------------
Full Address
عنوان مكان الدراسة او العمل
----------------------------------------------
Postal Code
الرقم البريدي
----------------------------------------------
Country
البلد اللي فيها الشغل او الدراسة
----------------------------------------------
City
المدينة
----------------------------------------------
Phone 1
تليفون
----------------------------------------------
Phone 2
تليفون
وزي ما قلنا مننساش ان كل الحاجات المكتوبة بالاسود ممكن نسيبها مش لازم نملاها
================================
الخانة اللي بعدها خاصة بتفاصيل الاقامة , زي الصورة ديه
http://on.fb.me/1JS9RMa
----------------------------------------------
Purpose of Stay
بيسال علي غرض الاقامة , افتح القايمة واختار العنصر السادس اللي هو ده
The ones to attend with the aim of tourism
----------------------------------------------
Explanation of the Purpose of Stay
هنا بيقولك اكتب وصف لغرض السفر , وممكن تسيبها فاضية لو عايز
----------------------------------------------
Requested Duration
المدة المطلوبة قد ايه , اكتب رقم 1 واختار
Year
يعني لمدة سنة واحدة
----------------------------------------------
Date of Probable Entry into Turkey
اختار تاريخ دخولك تركيا , عن طريق انك تدوس علي الايكونة الصغيرة اللي علي اليمين وتختار التاريخ
بس كذا مرة احاول اختار التاريخ ميرضاش , فسيبها مش مشكلة عشان زي ما قلنا اللي لونه اسود مش هيفرق كتير
----------------------------------------------
Type of Health Insurance
نوع التامين الصحي
وهنا بيجيبلك كذا نوع
فانت اختار الاختيار التالت اللي اسمه
Private Health Insurance
ومعناه , تأمين صحي خاص
ولو بتقدم لحد سنه تحت الـ 18 سنة او فوق الـ 65 فمش هيحتاج تامين صحي , وتختار الاختيار الرابع
Under 18 years old or over 65 years old
----------------------------------------------
Validity Date of Health Insurance
هنا تكتب تاريخ انتهاء التامين الصحي , اللي هو بيكون سنة من تاريخ الاشتراك
----------------------------------------------
Special Need Status
هنا بيقول لو ان الشخص اللي بيتعمله الاقامة ليه حلة صحية خاصة , وهي اربع اختيارات , اعمل علامة صح لو عنده ايا من الحاجات ديه
Disabled
يعني عنده اعاقة
Pregnant
حامل
Elder
رجل مسن
Unaccompanied Child
طفل بدون رفيق له
----------------------------------------------
Income Status
هنا بتقول حالتك المادية , والاختيارات هي
No income
لا يوجد دخل
0-Net Minimum Wage
أقل من الحد الأدني للأجور
Net Minimum Wage-1500
من الحد الأدني للأجور إلي 1500 ليرة شهريا
1500-3000
من 1500 ألي 3000 ليرة شهريا
3000-5000
من 3000 ألي 5000 ليرة شهريا
5000 and over
أعلي من 5000 ليرة شهريا
----------------------------------------------
Source of Income
سؤال عن مصدر دخلك , تكتب بقي ان عندك شغل او بنزس او عقارات او مشاريع في مصر
----------------------------------------------
Educational Background
المستوي التعليمي , وهي كالتالي
Illiterate
لا يقرا أو يكتب
Literate but school not completed
يستطيع القراة لكن لم يكمل تعليمه
Kindergarten and equivalent
حضانة او ما يعادله
Elementary school
ابتدائي
Primary education
إعدادي
Secondary education
ثانوي
High school and equivalent
ثانوي برضه
Associate degree and equivalent
مؤهل متوسط
Undergraduate and equivalent
شهادة جامعية
Post graduate and equivalent
دراسات عليا
Doctorate and equivalent
دكتوراه
----------------------------------------------
Occupation
وهنا تختار مهنتك , وده عن طريق انك تبدأ تكتب الحروف بتاعها بالانجليزي وهو هيجيبلك قايمة , يعني مثلا لو انت مدرس , ابدأ اكتب
Teac
فهو يكملك ويجيبلك انواع المدرسين وهكذا
================================
الخانة اللي بعدها فيها العنوان والتليفون , زي الصورة دي
http://on.fb.me/1OCDsNi
----------------------------------------------
Choose Address
هنا اكتب العنوان بتاعك في اسطنبول , ويكون نفس العنوان اللي في عقد الإيجار
لما تدوس علي الزرار الأحمر هيطلعلك ست خانات هي :
Province
فتحتار منها المحافظة , اسطنبول مثلا
District
ومنها تختار المنطقة في اسطنبول , تختار افجلار مثلا
Quarter / Village Quarter
وديه منها تختار البلدية اللي جوة المنطقة , فتختار جيهانجير مهاليسي مثلا
لما تختارها هيطهرك في قايمة الـ
District, Street, Avenue, Square (DSAS)
اسماء الشوارع في المنطقة ديه , تختار مثلا
Aras Sokagi
ومنها تختار الـ
Block
ومنها تختار القايمة اللي تحتها اللي هي
Single Space
وخد بالك الموقع بيستغبي شوية , فانت لو سايب اي خانة من ال 6 دول فاضيين مش هيقبل , فلازم تملاهم حتي لو العنوان متغير حاجة بسيطة عن عنوانك الحقيقي , وطبعا سهل جدا تستعين بجوجل مابس عشان تعرف الحاجات ديه كلها
----------------------------------------------
Phone 1
اكتب تليفونك في تركيا
----------------------------------------------
Phone 2
لو عندك رقم تاني اكتبه
----------------------------------------------
E-mail
اكتب ايميل حقيقي شغال
================================
نيجي هنا علي الخانة الأخيرة في الصفحة ديه , وهي عبارة عن 5 اسئله بتجاوب عنهم ,زي الصورة ديه
----------------------------------------------
Does he/she accept to pay for depts and penalty due to violation of visa, previous residence permit pursuent to the Laws No 6183 and 5237
هل مستعد انك تدفع اي غرامة نتيجة كسر الفيزا او كسر اي اقامات سابقة , اختار YES
----------------------------------------------
Does the person stay in a different country instead of the country of which he/she holds citizenship?
هل تقيم في دولة غير دولتك الأصلية , لو انت مقيم بشكل اساسي في مصر اختار لا , ولو كنت مقيم في اي بلد تاني اختار ايوة
ولو اخترت ايوة , هيطلعلك سؤالين
Number of Residence Permit
تكتب رقم اقامتك في البلد ديه
Validity Date of Residence Permit
تاريخ انتهاء الاقامة ديه
Has he/she applied for visa before?
هل قدمت علي تاشيرة تركيا قبل كدة
لو مقدمتش قبل كدة اختار لا , لو قدمت اختار ايوة , وساعتها هيطلعلك سؤال جديد اسمه
Conclusion
يسالك فيه علي نتيجة التقديم السابق هل هي :
Accepted
تم الموافقة عليها
Rejected
تم رفضها
Cancelled
تم الغائها
----------------------------------------------
Has he/she applied for a residence permit before?
يعني هل قدمت علي إقامة في تركيا قبل كدة ؟
لو مقدمتش اختار لأ , لو قدمت قبل كدة , هيطلعلك سؤال شبه السؤال اللي فات بنفس الإجابات
Accepted
تم الموافقة عليها
Rejected
تم رفضها
Cancelled
تم الغائها
----------------------------------------------
Has he/she had a health problem which can pose a threat to public health?
هل عنده مشاكل صحية ممكن تأذي الآخرين
لو مفيش اختار لأ , لو فيه اختار ايوة
================================
لما تخلص كل حاجة وتدوس علي زرار
Continue
هتطلعلك الشاشة ديه
وفيها بيقولك انك لازم تيجي بنفسك في المعاد اللي هيتم تحديده في الشاشة الجاية , وتجيب معاك الورق التالي :
Documents
• Residence Permit Application Form (Signed)
• Original copy and photocopy of passport or passport substitute (the pages which are processed with the pages over which there are identity information and photo)
• four (4) photos
• Notification regarding sufficient and sustainable resources for the duration of their stay (Notified in the application form. Management may ask for supportive document.)
• Valid Health Insurance ( one of following health insurances is enough)
o The document that enables benefit from the health services in Turkey within the scope of bilateral social security agreements
o The certificate of authorization received from Social Security Institution
o Proof of application made for general health insurance to Social Security Institution
o Private Health Insurance
• Upon request by administration, information and document relevant to place of accommodation and travel plan
- استمارة الاقامة ممضية
- اصل وصورة من جواز السفر
- اربع صور شخصية
- اوراق بممتلكاتك او مصادر دخلك طول فترة اقامتك ( محدش بيسال عنها )
- شهادة التامين الصحي
- اي مستندات اخري ممكن يتم طلبها منك
وبيقولك خد بالك من الحاجات ديه
• Additional information and document may be requested by administration.
• Photo must be taken within the last 6-month (frontal, clear face, in a way that the foreigner can be recognized easily) with a white background and as biometric.
• In cases where passport is not written in Latin letters, certified translation by a sworn translator or official authorities shall also be added to the application.
• If name and surname have not been written seperately in the passport, the foreigner is requested to submit a document showing his/her clear identity information to be taken from his/her own representative office.
• Administration may request certificate of birth for foreign minor in the process of application for residence permit.
• The foreigner shall be given the complementary information and documents required during the application and he/she are required to submit those documents max. in 30 days. Otherwise, the application shall be cancelled
• In cases where the person concerned is under the age of 18, a deed of consent which shall be given by his/her mother/father who lives abroad or by legal representative and also the recognizance which shall be given by natural or legal persons on condition that it is stated in the deed of consent are required to be submitted to the administration.
• Also, please visit the adress below stated for residence permit application documents and required explanation http://www.goc.gov.tr/…/ikamet-izni-basvurulari-icin-gerekl…
- ممكن يتم طلب مستندات اخري يوم المقابلة
- الصور لازم تكون حديثة وفي خلال 6 شهور من تاريخ المقابلة مش اكتر من كدة
- ان مكانش الباسبور مكتوب بحروف لاتينية فلازم ترجمة موثقة للباسبور
- لو الاسم و الاسم الاخير مش مكتوبين بشكل منفصل فلازم وثيقة رسمية تجيب الاسم الاخير ( ديه ورقة السفارة اللي قلنا عليها )
- ممكن يتم طلب شهادة الميلاد
- هيتم إخبارك باي مستندات ناقصة , وليك مهلة 30 يوم عشان تجيبهم
- لو اللي هيقدم الطلب تحت الـ 18 سنة وابويه مش موجودين في تركيا فلازم موافقة رسمية من ابويه
----------------------------------------------
المهم سيبك من الكلام ده كله ودوس
Continue
----------------------------------------------
فجأة هيقلب تركي ويسألك السؤال المستفز ده
Emniyet Genel Müdürlüğü'nden 18 Mayıs 2015 tarihi ve sonrası için alınmış bir randevum var.
السؤال ده معناه , هل ميعادك تم اتخاذه بعد يوم 18 مايو وهو التاريخ اللي تم تطبيق فيه النظام الجديد للإقامة
بس مع ان الترجمة معناها الكلام ده , الا ان الاجابة هتكون العكس
فلو إنك بتقدم علي الإقامة لأول مرة اختار " لأ " , لكن لو كان ليك معاد قبل يوم 18 مايو اختار "ايوة"
لو انت مقدم اول مرة متخترش ايوة , عشان هيتعامل علي اساس ان ليك معاد قديم , وكدة هحيصل مشاكل في المقابلة
وخد بالك ممكن لما تختار لأ , يقولك مفيش مواعيد , فكدة هتضطر تقفل وتعيد من الاول لغاية لما يجيلك ميعاد
----------------------------------------------
سواء اخترت ايوة او لأ هتظهر الصورة ديه
http://on.fb.me/1h5Myrb
ويقولك اوعي تنسي تيجي يوم الميعاد بتاعك ومعاك كل المستندات , وان اي بيانات خاطئة هنليغلك المعاد
بعدها هيقولك اختار المعاد من خانة التاريخ , افتح الايكون بتاع التاريخ واختار المواعيد المناسبة واختار
Continue
وخد بالك ان فيه اتنين ايكون الايكون الخاص بالنتيجة تختار منها اليوم , والايكون الخاص بالساعة تختار الساعة اللي انت عايزها , وطبعا تراعي يكون في مواعيد العمل الرسمية , من 9 صباحا ل 3 العصر , باستثناء ساعة راحة في النص
----------------------------------------------
لما تختار المعاد مظبوط , وتدوس
Continue
هتطلعلك الشاشة ديه
http://on.fb.me/1I2rH0L
ولما تدوس علي الكلمة ديه
Residence Permit Application Document
هينزل ملف بي دي اف , فيه بياناتك الكاملة والصورة اللي انت رفعتها , اطبع الورقة ديه , وامضيها بايدك وروح بيها يوم المقابلة
واللي بيقولك ان تم عمل موعد ليك يوم كذا , وان فيه مصاريف 55 ليرة تكون جاهزة معاك ساعتها
وانك لازم تيجي يوم كذا الساعة كذا في امنيات فاتح اللي في شارع وطن
================================
طيب انا كدة حجزت الموعد , اعمل ايه بقي يوم المقابلة
هنا اخونا المهندس محمد سعودي حكالنا بالتفصيل تعمل ايه يوم المقابلة :
الخطوة اﻷخيرة فى تقديم أوراق الإقامة
الراندفو . الموعد . المقابلة. اﻷوراق المطلوبة
- ازاى توصل ؟
بالمترو تنزل أمنيات فاتح Emniyet Fatih وتخرج تعدى الطريق وتمشى 3 دقايق هتلاقيها على اليمين.
لو جاى باتوبيس رايح فى اتجاه يوسف باشا اكسراي زى مثلا 76D
ممكن تنزل أى محطة من دول (فينديكازى - هاسكي - يوسف باشا - اكسراي ) هاسكي وفينديكازى أقرب عشان متمشيش كتير إنما أى واحدة منهم هتوصلك ان شاء الله.
بعد متنزل من الاتوبيس هتعدى الناحية التانية من الطريق بعد الترام والاتجاه العكسي وتدخل أى شارع قصادك تمشى حوالى 200 متر لحد الشارع ميخلص بحيث تروح فى الاتجاه التانى خالص بتاع المنطقة دى اللى هو لو مشيت يمينه طوالى هتلاقي اكسراي. امشى انت بقه شمال طوالى حوالى 7 دقايق كمان هتلاقى المبنى على اليمين (هتعدى الطريق بردو) جنب بوليس استنبول
واو انت فى اكسراى نفس الكلام. هتخلى محطة مترو اكسراى فى ظهرك وتمشى طوالى على الرصيف اليمين. لحد متوصل.
ممكن وانت ماشى تسأل اى حد لو توهت او للتأكيد. قوله استنبول بوليس أو اقامات (بالعربى والتركي زي بعض) . لو متعرفش تركي مش هتفهم منه أى حاجة طبعا بس هيشاورلك على الاتجاه على الأقل
- اﻷوراق المطلوبة:
1-ابليكيشن التقديم اللى انت عملته على اﻻنترنت ممضي
2- أصل و صورة من الباسبور والفيزا اللى جوه الباسبور
3- أصل شهادة اللقب
4- أصل و صورة من عقد الإيجار
5- أصل السيجورتا (بياخد الأصل مش فاهم ليه )
6 - 4 صور شخصية
كان معايا الحساب البنكى (مصري لأنى معرفتش اعمل تركي) وشهادة السابقة بتاعت العدلية. تعمدت انى أخفيهم واشوف هيحتاجهم ولا لأ واقوله مش معايا وكده واشوف هيعمل ايه عشان الناس اللى مش معاها وفعلا مطلبهمش.
يعنى ولا مطلوب حساب بنكي وﻻ ورقة العدلية دي. استمارة التقديم بتقول انه ممكن يسألك على الحساب البنكى أو يسألك هتعيش ازاى فى البلد. كمان معرفش الوضع ايه لو انت أسرة مش فرد. وانا أول مرة وليس تجديد.
اجمالا التجربة فى المكان كانت سيئة.
انا كان موعدى فى الاستمارة الساعة 4 . انا قلت تركيا وبتاع أكيد نظام هروح فى موعدى هلاقى الموظف مستنينى
المهم روحت انا الساعة 2 طلع الموعد اللى فى الورقة ملوش أى لزمة. اللى بيجي الأول بياخد دوره ويدخل.
الصدمة التانية انى قلت أكيد عاملين حسابهم والموظفين بتكلموا عربى وانجليزى وتركي أو على الأقل انجليزى وتركى . مع الأسف تركي فقط.
المكان مش منظم. أو شبه منظم. بس أسوأ مصلحة حكومية دخلتها فى تركيا حتى الآن( لا اقارن بمصر - اقارن بباقى تركيا). ماشيين طوابير. ومفيش نظام انك تاخد الرقم وتقعد تستنى دورك كما تعودنا فى تركيا. الموظف بينادي على اللى عليه الدور وبينادي فى سره . اضطريت كل شوية اقوم من الكرسي واروح جنب الباب أشوف ناقص اد إيه. المفروض انهم بينادوا بس معرفش مسمعتش حد.
فالمهم انت أول متدخل المبنى بتطلع الدور التانى تروح على مكتب الاستقبال أول متدخل هيديك رقم مثلا
D-32 -16
ده معناه انك هتروح على غرفة رقم D على الموظف رقم 32 جواها بيكونوا كاتبين الرقم على شاشة الكمبيوتر بتاعته بشكل واضح كبير. وانت رقم 16 عنده. هتروح تديله الورق وتستنبط من الورق اللى قدامه قدامك حوالى كام واحد أو تشوف آخر واحد كان رقمه كام وتنتظر وتتابع على الباب.
قعدت ساعتين فى الحوار ده. وكان موظف بارد وبطيء مع أنه شاب و كمان بيستخدموا انترنت اكسبلورر يعنى برود موظف وبطء وبرود براوزر. لحين الموظف مخلص كانت الساعة بقت 4 نزلت لقيت الخزينة قفلت اضطريت اجى تاني يوم مرة تانية. وصلت 12:15 كانت الخزنة فى البريك وقفت طابور تانى رخم على الخزنة لحد مدفعت خدت بتاع ساعة كمان فى الطابور ده.
فاللى يروح يحاول ميروحش وقت البريك. يعنى تكون هناك على 9 او 1:30 لو مش هتقدر بدرى
المفروض قاللى ادفع 55 ليرة. الراجل بتاع الخزنة قاللى 85 وكتبلى ايصال فعلا بالمبلغ ده (ضرب فى جيبه 1.5 ليره عشان الوصل كان مكتوب فيه 83 وكسر)
المهم بعد متدفع وتاخد الايصال هتطلع بيه تانى مع الورق بتاعك كامل اللى المفروض الموظف راجعه ودبسه واداهولك وتديه تانى للموظف وتنتظر شوية لو في ايده حد يخلصه ويناديلك. هتقعد معاه 5 دقايق كمان او 10 هيطبعلك الاستمارة ويحط عليها صورتك ويديهالك والحمد لله . اوعا تمشي لسه
المفاجاة التالتة اللى فكرتنى بأم الدنيا انك لازم تاخد الورقة دى تختمها من مكتب تانى
مكتب صغير كده على جنب. الصراحة مخدتش فى ولا دقيقة وريته الورقة ختمها ختمين على الصورة وعلى امضاء الموظف التانى. أخدت الورقة ومشيت الحمد لله . المفروض بعد كام يوم(معرفش كام بالظبط) بروح استلم كارت الاقامة الأحمر ده لما اعرف هقولكم.
ملحوظة : ممكن يكون الطوابير والتأخير سوء حظ بالنسبة ليا أو سوء توقيت. ممكن ميحصلش ده فى حالتك.

================================
وهنا اخونا ياسر فتحي كتب برضه هو عمل ايه بالظبط
ده اللي حصل معايا روحت بدري 8 ونص والطابور كان طوييييل وصلت تقريبا قرب 11 همه بينظموا الدخول مجموعات علشان الضغط جوه يفضل تروح بدري ولما تدخل تطلع الدور التاني واحد حيديك ورقة في حرف A او B او C او D وفيها رقم المكتب اللي انت حتدخل تديله الورق ممكن مثلا يكون D29 الحرف مكتوب على باب الغرفة من بره والمكاتب جوه عليها الارقام
الموظف حيراجع الورق ان كله تمام ويقولك انزل الدور الاول ادفع الفلوس تقريبا حيعملوا في حدود 77 ليرة ونص تقريبا او ازيد شوية بعد الدفع حتاخد الايصال وترجع تاني لنفس الموظف علشان يستلم الورق ويدبس فيهم الايصال ( حاول تاخد صورة الايصال بالموبايل وانت واقف قبل ما تسلمها ) المفروض الموظف حيصور الايصال ويديك الصورة ( خد انت الصورة احتياطي بالموبايل علشان لو نسى او طنش او الماكينة مش شغاله ) ومعاها ورقة تسمحلك بالسفر لكن بحد اقصى اسبوعين وبعد اسبوعين الورقة دي مالهاش قيمة
المفروض الموظف حياخد تليفونك ويتاكد من العنوان اللي انت كاتبه في العقد لان بيقولوا الاقامة حتتبعت على العنوان ده
بس كده تقريبا ده اللي حصل معايا يوم الجمعة اللي فاتت وقدمت انا وزوجتي واولادي
================================
أخيرا بقي عشان زهقت منكم , يوم المقابلة لو كل حاجة تمام , هيديلك وصل ان الدنيا تمام , وان الاقامة هتتبعتلك بالطرد علي عنوان , وتابع معاهم ومع شركة البي تي تي , عشان ممكن ينسوك
ولو فيه اي حاجة ناقصة هيقولك ارجع وهات كذا كذا وتعالي خلال اسبوعين مثلا
بس , خلصنا الحمد لله
نرحب دائماً بالنقاشات المجدية والتعليقات التي تغني موضوعاتها 
 ،أنشر الموضوع ليعلم الناس الحقائق وكن أنت الآعلام البديل
في

ليست هناك تعليقات:

إرسال تعليق

الاشتراك في: تعليقات الرسالة (Atom)