عايز اعمل شير للبوست ده عشر مرات
عزيزي طالب الجامعة،اللي في آخر سنة بكالريوس وخلص الميدترم وقرب يخرج للدنيا،وزميله اللي أصغر منه ولسه قدامه سنة دراسية أخري..
-خاب وخسر،خاب وخسر،خاب وخسر اللي دخل الكلية وخرج منها و مفيش في جيبه غير التقدير،لا بيعرف لغة ولا طور قاعدته المعرفية بالقراءة،ولا كون شبكة علاقات تساعده علي ايجاد وظيفة..هتعاني أشد المعاناة في حياتك،وهتضطر تقبل بوظائف مرتباتها باهتة،وعدد ساعات عملها قاسية،ده إن لقيتها من الأساس..فاستعد نفسيًا لتلقي صدمات بعمرك كله في اول شهور ما بعد التخرج..هتدفع ثمن الوقت اللي أهدرته في الجامعة علي الفاضي..قرش قرش،سنت سنت..
-انسي اسم الكلية بتاعتك خالص..سوق العمل مالوش في الشهادات مُطلقًا..اسم كليتك وشهادتك كانوا مفيدين لماما وبابا وهما بيتفشخروا بيك قدام طنط ليلي وعمو رجائي..لكن في السوق هتلاقي شاب خريج تجارة اتنحرش وخد كام دبلومة وعرف يظبط أكسنت انجليزي وخلع يشتغل في الخليج وبياخد مرتب كويس،وشاب خريج تربية ألماني بيشتغل في مدرسة في قطر بكام الف ريال،وانت يا بتاع ألسن وسياسة وإعلام بتعافر علي وظيفة بمرتب بائس..ارمي شهادتك علي عتبة الكلية ،واعرف أن الرزق مالوش دعوة بمؤهل،له دعوة بتطوير قدرات تخليك تنافس علي 100 مكان..
-اوعي تتنك علي الشغل..كل حاجة في الكون لها بداية،مش عيب خالص لو بدأت من حاجة متواضعة وفي غير تخصصك،لأن قدراتك أقل من وظيفة أحلامك..ناس مشاهير كتير بدأوا من مكان ما..يوشكا فيشر وزير خارجية ألمانيا السابق كان سواق تاكسي،ميركل كانت بتخدم علي زباين في مطعم،ساندرا بولوك كانت نادلة ومربية أطفال..بس العيب أنك تقف عند الخطوة دي وتقضي فيها بقية حياتك،بدل ما تعتبرها مرحلة انتقالية تتطور فيها نفسك وتروح مكان أفضل..والعيب الأكبر أنك تقول مش لاعب أصلًا..وتقعد تستني وظيفة أحلامك لغاية ما تجيلك..ابقي قابلني لو لمحتها..
-الحياة مش عادلة،والدنيا مبتديش للناس اللي يستحقوه..تؤ تؤ.. ده كلام يبرر به العاجزون عجزهم علي أنغام دايمًا دموع لحمادة هلال، وآخرته قطر الحياة هيفوتك وانت بتعدد وتلطم والناس هتكون ركبت صواريخ وحققت أحلامها..مشوفتش واحد من أول ما اتخرجت طفح الدم وعمل كل اللي عليه،وربنا خذله وضيع تعبه..وكلهم كانوا أقل منك في الظروف وشافوا المر ألوان..ودلوقتي في مراكز بحثية من ميونخ لبون لبرلين،ومتنطورين علي مقاعد الجامعات في كل ركن في الكوكب،واللي قرر فيهم يقعد في مصر خد وظيفة أحلامه..
-حذار من دوامة الأوهام..في ناس بتترعب من مواجهة بُكره..وبدل ما تشيل الرعب من قلبها وتقوم تشوف بكره عايز ايه..بتأجل المواجهة..في اللي بيعشم نفسه بالسفر وهو غير مؤهل ويمشي السكة ويلاقي المحصلة صفر..و في اللي بيدخل يكمل دراسات عليا لمجرد انه يبقي بيعمل حاجة تنفي عنه صفة البطالة..وسكك تانية كتير..بس مش هتفوق غير لما تلاقي سكينة العمر سرقتك،وأن اللي أجلت مواجهته في سن 21،مضطر تواجهه تاني في سن 27 ومافوق..وهنا ثمن الرجوع بيبقي صعب فوق ما عقلك يتخيل،ومحتاج إنسان جبار يقدر يدخل نفسه دوامة الحياة من جديد،وتوفيق لا يتوافر للكل...
-ادي لنفسك فرصة للتفكير بعد التخرج..هل لازم أشتغل في المجال اللي بترسمه شهادتي الجامعية؟ ولا في شئ تاني ممكن أعمله أو هواية بأحبها وعايز أعافر فيها لغاية ما تبقي مهنة..اسأل نفسك مليون مرة عن مكانك بعد 20 سنة،عن شغفك،وعن الحاجة اللي هتقوم تعملها بنفس كل يوم..حدد أنت عايز ايه من الدنيا بعد التخرج واسعي فيه..بدل ما تبدأ سكة طويلة وتيجي في منتصف الطريق وتسأل نفسك أنا فين؟وبعمل ايه؟ وايه اللي مشاني السكة دي؟،وهنا مفيش غير طريقين، يا إما تغير الكارير وده ثمنه عسير،يا إما تكمل بقية حياتك في بؤس،وتعيش عشان تاكل وتشرب وتربي العيلين..
-لا تُقيد نفسك بارتباط عاطفي أو التزام أسري وانت بتقول يا هادي..ثقافة الارتباط المُبكر في مصر قائمة علي التسبيل وسماع الأغاني وامتلاك كل واحد للتاني والتدخل في أدق تفاصيل الحياة الشخصية بشكل مقيت ..حاجة بتخلي الطرفين يجيبوا بعض ورا،بدل ما يشدوا بعض لقدام..فلا أنت بنيت علاقة سليمة،ولا تقدمت في مجالك الوظيفي..مجرد خصم من مجهود انت محتاج كل نقطة فيه في بداية حياتك..ثبت نفسك في شغلك،اقف علي أرض صلبة وفكر في موضوع الارتباط وأنت أكثر نضوجًا..
-أخيرًا..مش بأحب أنصح ولا أعيش في دور الواعظ الحكيم..بس علي مدار ال 5 سنوات الماضية شوفت خريجين كتير كانوا عارفين هما عايزين ايه وتعبوا عشان يعملوا حاجة،ودلوقتي رجلهم علي أول طريق أحلامهم..وخريجين أكتر تكاسلوا،فتعثروا،فتاهوا،فسرقتهم سكينة العمر..وكل أمنياتي انك متبقاش واحد من المتعثرين والتائهين..شعور قاسي بمجرد أنك تسمع قصصهم وتشوف ملامح الخيبة علي وجوههم ووجوه محبيهم.ما بالك بإحساسهم هما..وما بالك لو كنت واحد منهم..
آخر فترات الراحة في عمرك كله هتنتهي مع آخر امتحان جامعي.والقادم صعب..حياة بمعني الكلمة هتقف فيها أعزل من كل شئ إلا من علمك ومجهودك..كُن مستعد بكل ما تملك..كل تخبط،وتسويف واستهانة ثمنهم عمر
بيضيع ووقت مش هتعوضه بمال الدنيا.
بيضيع ووقت مش هتعوضه بمال الدنيا.
ليست هناك تعليقات:
إرسال تعليق