ايمن عز الدين يكتب
روووعه لدرجه اني قرأتها اكتر من مره
أوعي تفوتك
((أنا عِشت طفولتي في الستينات. وكان الإسلام مختلف حبتين عن دلوقت))
بكل تلقائية كتب أحد مواطني هذا الكوكب الأزرق بوست وصدره بهذه الكلمات .. بوست خطير جداً يجسد حقيقة أخطر .. وبدون مقدمات طويلة اسمعوا صاحبنا ده قال إيه:
((الإسلام على أيامنا زمان:
١- ماكناش نعرف ولا واحدة محجبة فى مصر كلها، غير أم محمد إللى كانت بتشتغل عند عمتى فوزيّة.
٢- ماكانش فيه ولا راجل عنده زبيبة فى وِشُّه، غير البيّاع السُنّى إللى كان شغّال فى العُجيل بتاع وسط البلد.
٣- عمرى ماشُفت راجل فى الشارع لابس جلابية قصيرة، ولا سِت منتقبة.
٤- ماكانش فيه ستات بتروح تحضر درس عند سوسو صاحبتها .. وماكانش فيه حد بياخد دروس فى التجويد
5- نادراً لما حد كان يزورنا في البيت يسأل على سجادة صلاة أو إتجاه القبلة فين.
6- الناس عمرها ما كانت بتوقف شغلها أو إجتماعاتها علشان يصلوا العصر جماعة
7- ماكانش فيه مكوجى إسمه (الحرمين) ولا بقّال إسمه (زمزم)
8- لما حد كان بيخلف عيّل، كانوا بيعملوله (سُبوع) مش (عقيقة)، وماكانوش بيسمّوا عيّالهم (حُزيفة) ولا (أنَس)، بس جيران عمتى عايدة فالجيزة كانوا ناس بلدى قوى وكان عندهم واد مسمّيينُه (أبو هريرة).
9- عمرى ما إهتميت ولا سألت زميلى فى المدرسة إذا كان مسلم ولّا مسيحى.
10- لما كنا بنرُد على التليفون كنا بنقول ألو مش أسّلاموعليكو))
وقام ختم أخونا أبو لهب ده البوست بتاعه بجملة كوميدية جداً فقال:
((وبرضو كُنّا بنصلّى ونصوم ونزكّى، وعارفين ربنا والصح والغلط، بصراحة وحشنى قوى الإسلام ده.. ونفسى يرجع تانى))
• البوست أخد مئات الإعجابات .. والحقيقة الراجل ده بيمثل قطاع عريض جدا من الشعب بس الفرق بين الراجل ده وبين ملايين زيه إنه شجاع وصرح بالحقيقة بعبارات واضحة .. مبدئياً كده عندك ملايين النصارى في مصر يتمنوا إسلام الستينات ده يرجع تاني ..
مصر بتاعتنا ومصر بتاعتكوا
------------------------------------
من كام يوم نزل فيديو كلب إتشهر إوي (مصر قريبة) لما حطيته جنب كلام الراجل ده افتكرت سؤال دايما كان بيخطر في بالي:
التيار الإسلامي بذل كتير عشان الكلمة دي (الهوية) بس ساعات باحس إننا بنتكلم كلام الناس مش فاهماه .. ياترى الناس فاهمة قضيتنا وكلمات كبيرة بنقولها زي (صراع الهوية) و ( معركة الوعي ) إلخ؟
الراجل ده + الفيديو كلب ده = قدروا ببراعة شديدة جدا إنهم يوصفوا مصر اللي احنا بنحاربها كتيار إسلامي .. إحنا مش بنحارب مصر .. إحنا بنحارب مصر دي .. مصر اللي الراجل ده وصفها .. مصر صافيناز ..
مصر السبكي ..
مصر حكومة مبارك الفاسدة اللي الانقلاب رجعها كاملة بكل فسادها ..
مصر اللي بتغمز فيها عسكري المرور ب 20 جنيه يلغيلك مخالفة ب 500 جنيه ..
مصر اللي الناس ما بتوقفش فيها شغل عشان تصلي ( الراجل زعلان اوي من الموضوع ده
مصر اللي خوفت الناس من الصديق أردوغان وشيطنت الصديقة المكافحة حماس ..
مصر فستان أنغام القصير اللي على رأي واحد صاحبنا قليل الأدب شوية قال لو واحدة لبسته بالليل على الكوبري حتنزل حامل في الشهر الرابع ((بس هما مصرين إن تيجي اللحظة اللي تمشي فيه المصريات كده في مصر بتاعتهم)) ..
مصر العمر الضايع عالقهاوي اللي قعد عليها هنيدي وعزت ابو عوف وشريف منير ..
مصر بتاعتنا مافيهاش واحدة بتدي واحد خليجي وردة بدلع عشان "تنشط" السياحة
السياحة في مصر بتاعتنا ليها أشكال تانية كتيرة حلال على راسها السياحة التعليمية بعد ما نصلح الأزهر اللي انت خايف تقول إنه واحد من مؤسسات مبارك الفاسدة زيه زي الجيش والقضاء والإعلام ..
مصر بتاعتنا لما الأزهر بس يقدم خدمات تعليمية جيدة حيجيبلك من السياحة التعليمية اضعاف اللي حتجبهولك منة شلبي وهي بترقص لخليجي وتسبله عنيها عشان تثبتلهم اننا بيس وآخر حلاوة وماعندناش إرهاب .. مع إن عندنا إرهاب ( بيقولك مرة بلد عملت أوبريت بيقول ان ماعندهاش ارهاب وهي عندها ..
احنا مصر بتاعتنا مافيهاش واحدة كاشفة خصلة من شعرها أصلا ..
إحنا بنتسرق .. دينا بيتحرف .. وبيتم تبديله من غير ما نحس .. إنت دلوقتي ما تقدرش تقول على المسيحي إنه كافر في التليفزيون ولو قولتها حتلاقي المذيعة البصمجية بتقولك : (( لا لا لا لا "حررك" لو سمحت ..لو سمحت .. ربنا بس هو اللي ليه حق التكفير إحنا مش حندخل الناس النار والجنة بمزاجنا .. باعتذر للمشاهدين على الكلمة "تشي" فاصل لو سمحتوا فاصل أنا مش مصدقة .. مش مصدقة إن التكفير بقة سهل كده)) أوهلالّا أمبوسيل
إنت ما تقدرش تقول في الإعلام على ال 21 مسيحين اللي ماتوا في ليبيا إنهم مش شهداء (مظلومين بس مش شهداء) لازم تقول شهداء .. غصب عنك لازم تقول وإلا تبقى إرهابي..
أما مصر بتاعتنا فما فيهاش لوع ولا مجاملات المسيحي كافر بنص القرآن وحقوقه على راسنا من فوق مش عشان عيونه لكن عشان برضو نص القران ..
مصر بتاعتنا الأعمال كلها بتقف ونصلي مع بعض ونرجع شغلنا عشان ربنا يباركلنا ..
مصر بتاعتنا ما بتزورش التاريخ على ولادها وتقول إن المصريين نزلوا في 30 يونيو بينما في الحقيقة اللي نزل في 30 يونيو هو جزء من المصريين قصاد جزء تاني كان في رابعة والنهضة ..
مصر بتاعتكوا غير مصر بتاعتنا خالص بل الإسلام بتاعكوا فعلا مختلف خالص عن الإسلام بتاعنا .. مصر بتاعتكوا (وممنوع الضحك) سألوا فيها هيفاء إيه الشئ اللي مش بيفارق شنطتك فقالت : المصحف grin emoticon grin emoticon grin emoticon
ده الدين بتاعكوا أيوة وما تقوليش انا برئ من الكلام ده لإنك عملت (30 يونيو) وانت عارف كويس إن اللي حيحكمنا هو خليط فلولي كنسي ليبرالي اشتراكي بإشراف دولة العسكر اللي أصلاً بتحكمنا من أيام عبد الناصر (باختصار دولة مبارك بكل مؤسساتها ولكن بوجوه جديدة) .. تفتكر دول حيجيبولنا إيه يعني ؟
مصر بتاعتنا ما حدش فيها يستجري أبدا يقول الكلمة الخطيرة جدا اللي بنكررها ليل نهار واحنا مش عارفين خطورتها (ما تدخلوش الدين في السياسة) !!
أما مصر بتاعتنا فالدين فيها بينظم السياسة عادي والدين دخل في كل حاجة حتى في طريقة دخولنا وخروجنا من التوالت فازاي مش حيدخل في حاجة كبيرة زي السياسة لكن مصر بتاعتكوا تقدر فيها سما المصري تترشح (للبرلمان) أكبر هيئة تشريعية ..
وبعدين أزوقلك آية زي دي ازاي :
(ومن لم يحكم بما أنزل الله فاولئك هم الكافرون) ها أزوقهالك ازاي ؟
اللي يحكم بغير شرع ربنا ربنا قال عليه كافر ..
احنا كتيار اسلامي مالنا ؟ وزعلان مننا احنا ليه ؟ أما تقابل ربنا يوم القيامة اتفاهم معاه وقوله : بص يا ربنا (حضرتك) عجبتني في كل حاجة الا الحتة بتاعت (إن الحكم إلا لله) دي .. قوله انا كان عاجبني الدين الكيوت بتاع خطبة الجمعة ام 5 دقايق وربك رب قلوب وصلاة العيد والسبحة المتعلقة في مراية العربية والمصحف القطيفة اللي في النيش ورمضان بتاع الفوازير واما كنت اشوف شبشب متشقلب وبطنه للسما كنت باعدله (لا لغاية دلوقتي في كتير ناس مقتنعة ان كده حرام ولازم يعدلوه .. زي شهقة التقلية بتاعت المولوخية كده)
منقوووول بتصرف
هناك تعليق واحد:
مصر مش محتاجه رئيس ولا وزير مصر محتاجه شعب يتقي ربنا و يؤمن بالتغيير ولا يغير الله ما بقوما حتي يغيروا ما بانفسهم
إرسال تعليق