النطاعة اسلوب حياه فلا تكن نطعا

اتشارك فى شئون بيتك ....... قلت نعم
فقال لى وماذا على الزوجه ...... قلت له ....... هى شريكة الحياه ......ولم تخلق لخدمة الرجال ..... بل لتربى الرجال .....
وهل هناك ماهو افضل من ان تكون فى عمل اهلك ........
فقد كان فيه من هو افضل واكرم منك ومنى ومن على زجه الارض جميعا .... رسول الله صل الله عليه وسلم......
ليت اولادنا بغهمون هذا ..... وفرق كبير بين ان تحدم فى ببتك محبة وببن ان تخدم فرضا........ يختلف عندها طعم الاشياء فلا تكن نطعا .... لاينقص هذا من رجولتك...ابدا.........

مصر دولة مدنية

وإحنا صغيرين أمي كانت بتجيب واحدة ست كل شهر تعمل الشغل الصعب في البيت زي التسييق والمسح وتنفيض البيت وغسل السجاد.. إلخ.. مكانتش راضية عن الأداء دايما وكانت بتغير الست دي كتير لأنها مش بتنضف بالقدر الكافي وساعات كنا بنتسرق وهكذا..

أختي بدأت تكبر.. فأمي بدأت تستغني عن موضوع الست ده بصداعه وهي و اختي يقوموا بالشغل ده.. ده طبعا مع الطبخ اليومي وغسل الأطباق والغسيل وتنشير الهدوم..

كل ده وفي ستات بتعمل كل ده في مصر بالأضافة انهم ستات بتشتغل برة البيت ومنهم كمان اللي بيعول أسرة..

الراجل في مصر تقريبا مبيشلش طبق حتي وراه بعد ما يطفح.. المهم انا فضلت نطع كتير لحد ما سافرت للدراسة.. وبقيت كل المهام دي علي قفايا.. في أول كام سنة كنت عايش في زريبة أو أقذر.. لأني راجل مصري نطع مش متعود يغسل طبقه فمابالك يشيل مهام التنضيف والغسيل وغيره.. وتخيل شحط عنده 18 سنة بيرجع بغسيله الوسخ لأمه عشان تغسلهوله كل اسبوع..

مع الوقت بدأت اتغير وبقيت اطبخ و اغسل واسيق ولا اجدعها كريمة مختار.. لما برجع بيتنا بقي بعد التجربة دي أدركت مدي المجهود اللي أمي واختي كانوا بيعملوه.. ومكانوش بيرضوا اعمل حاجة بردو لما بقي عندي دم عشان انا متغرب ومتبهدل وبيعملوا الكلام ده بإخلاص وتفاني عجيب.. كنوع من الحب..

مش نسوية ولا حقوق مرأة ولا الكلام ده.. بس الستات في مصر بتبذل مجهودات رهيبة ومع ذلك اغلب الوقت كل اللي بيشوفوه تأمير و نطاعة و الأكل ليه بارد؟ و خلصوا دوشة التنضيف دي بسرعة.. وكل يوم بطاطس؟ كلمة شكرا حتي مبيسمعوهاش غير في عيد الأم ولا حاجة..

مأساة حقيقية ان الذكر المصري بيتربي عشان يطلع نطع.. ومن اول يوم بيتولد فيه بيبقي ده حق من حقوقه المشروعة سكن وأسم ملائم وأنثي تخدمه طول عمره..

عامة لو ربنا أراد يعني وفي يوم جه وكونت اسرة وبقي عندي أولاد.. هيكون أهم أهدافي في الحياة أنهم ميطلعوش أنطاع و كل واحد يشيل مسؤولية نفسه.. وشغل اختك البنت دي شغالة باللقمة في بيت ابوها لحد ما تروح شغالة باللقمة في بيت جوزها ده هيكون أول حاجة اشيلها من دماغ عيالي

نرحب دائماً بالنقاشات المجدية والتعليقات التي تغني موضوعاتها ،أنشر الموضوع ليعلم الناس الحقائق وكن أنت الآعلام البديل