انا كنت داخل اساسا علشان اشوف مصر عملت إية في معرض برلين للسياحة !! فعرفت إن كامل أبو علي رئيس أكبر شركة سياحة في مصر بيقول إن دي أول مرة من 24 سنة مناخدش عقد سياحي واحد .. الموضوع موقفش عند كدة .. الشركات المصرية والوزير زعزوع " شرشحوا " بعض في المعرض .. بعد ما الشركات إكتشفت الفضيحة .. خطة وزير السياحة في التسويق لمصر كانت عبارة عن عرض قصص وحكايات للموظفين المتضررين من توقف السياحة في مصر ... اه والله خطته كانت إنه بيقولهم " employers no food " مصحوبة بمزيكا مسلسل المال والبنون .
ميسكتش وزير السياحة بقى .. لأ قرر يصدمني وقال إن في 25 فندق قفلت رسميا .. وفي 72 فندق تانيين نسبة إشغالهم صفر .
لكن هووب لقيت الدنيا مقلوبة .. عرفت إن في كلام عن تعويم الجنية ؛ عرفت بقى إن البنك المركزي قرر يقلل قيمة الجنية بما يعادل 115 قرش النهاردة الصبح .. يعني الدولار سعر الرسمي 9 جنية .. دي الأسعار الرسمية ؛ لسة السوق السودا هتقول كلمتها أخر الشهر .. بعدين عرفت إن البلد فيها أزمة دولار لدرجة إن البنوك طرحت شهادات ادخار بفائدة 15% مقابل التنازل عن "الدولار" .. ايوا دا الشرط .. اتنازل عن مدخراتك الدولارية علشان تستفيد ..
قولت اروح أطمئن بقى عالمواطن محدود الدخل
فلقيت إتحاد الغرف التجارية بيقول إن خفض الجنيه بيقفز بالأسعار 40% وإن لجنة متابعة الأسعار هتحل نفسها .. لأن مبقاش ليها قيمة بعد ما الأسعار بقت بتزيد بشكل لحظي ..
إفتكرت سيادة الرئيس الزعيم الخالد وهوا بيقولنا إن الأسعار هتنخفض في ديسمبر وقررت أروح اشوف أعرق مدرسة دبلوماسية حصلت في تاريخ البني أدمين .. الدبلوماسية المصرية .
لقيت إن كان في مناقشة قرار في مجلس الأمن عن عمل عقوبة للتحرش الجنسي إللي بيرتكبه أحد أفراد قوات حفظ السلام ؛ قوم المندوب المصري يقرر يعترض ضمن سياسة " والنبي لنكيد العزال " .. طبعا مجلس الامن كاملا بالإجماع وافق على القرار لأنه عمره ما كان موضوع خلافي اساسا .. لكن مصر كانت الدولة الوحيدة إللي رفضت .
الموضوع ميتقفلش عند كدة .. مندوب مصر لسبب مجهول قرر يردح للمندوبه الأمريكية ويقولها " إنتي غاوية شهرة " - اه والله قالها كدة .. الست يا عيني مش عارفة فيه إية ولا الراجل دا بيعمل كدة ليه .. بس قالتله انا مش فاهماك بس اللي بتعمله دا ميعملوش عيل مراهق في مدرسة .. وراحت على تويتر وقالت أنا زعلانة من قلة القيمة اللي حصلت دي .. الراجل راح وراها على تويتر وردحلها وكانت حفلة .
جرايد العالم اللي طلعت النهاردة كلها بتبرز خبر بعنوان " مصر تدافع عن التحرش الجنسي لقوات حفظ السلام " .. غير طبعا سيول من التححفيل علينا وعلى معيلتنا في تعليقات القراء.. والحمد لله بعد ما اخبارنا في اخر 6 شهور بيتم تداولها في سياق بلد الإختفاء الفسري وقضية ريجيني والبرلمان الأوربي إللي بيدين مصر وبيطالب بوقف المساعدات .. النهاردة ضفنا ليها الدفاع عن الإعتداءات الجنسية grin emoticon
الواحد إطمئن على سمعة مصر ودبلوماسية مصر خصوصا بعد ما إكتشفت إن سياسة مصر في قضية ريجيني هي إننا بنشرشح لإيطاليا عن طريق احمد موسى وبنقولهم طب ما احنا كمان عندنا مواطنين مصريين مفقودين عندكوا ومبنتكلمش grin emoticon
وبينما انا علوضعي .. مجاش في بالي غير صوت الجنرال خراطيموا وهوا بيقولنا من سنة " إدوني سنتين بس وهتشوفوا مصر دي بقت إزاي "
،أنشر الموضوع ليعلم الناس الحقائق وكن أنت الآعلام البديل
ليست هناك تعليقات:
إرسال تعليق