نظريات الإقناع والتصديق بالإيحاء..

شكرى القوتلى

11 كارثة لم ينتبه لها أغلب الناس في خطاب السيسى 13 ابريل 2016
مصيبة خطابات السيسي انها بتبقى حافلة بال"العته اللفظي" اللى بيستدرج الناس للألش على ظاهر كلامه وتعبيراته المثيرة للسخرية والإستهزاء..وده بيشغلنا عن المعانى والأفكار الكارثية اللى ورا الكلام ده...معاني جديرة بالأسى والشفقة والبكاء المر على الفاجعة اللى ابتليت بيها مصر....
تعالوا نستعرض أمثلة على الكوارث دي:

1- جملة السيسي انه "ممكن يدخل على النت بكتيبتين جيش ويعملها دايرة مقفولة"...سبقتها جملة أخرى:
"احنا عندنا جيش على الإنترنت"...
والسيسي قصده هنا جيش بالمعنى الحرفي..مش مجرد لجان اليكترونية مأجورة..
لأنه فى الجملة اللي بعدها قال: "كتيبتين جيش"..
يعني..السيسي مجند بالفعل ظباط وعساكر على الفيس بوك وغيره..وكتير من الصفحات والتعليقات اللى بتشوفها على وسائل التواصل الإجتماعي مؤيدة للسيسي ليست إلا جحافل من "خير أجناد الأرض"..
لو كانت لجان اليكترونية مأجورة..ورئيس الجمهورية بيعترف بده تبقى بلوى..انما لما يكونوا دول ظباط وعساكر رسميين..فدي بلوة البلاوي..
(سيبك من تصوره الأهطل عن قدرته انه يقفل النت بآلاف العساكر والظباط)
_________
2- الألش على كلام السيسي عن "أمه" اللى وصته مايطمعش في اللى فى ايد الناس"..شتت انتباهنا عن السياق اللى قال فيه العبارة دي...

البيه كان بيتكلم عن الجارة ليبيا..وانه كان ممكن يحتلها و"يسرق" بترولها...استغلالا لظروفها السيئة..لإنقاذ الإقتصاد المصري...لولا نصيحة أمه..
انت متخيل يعنى ايه رئيس مصر..بمكانتها بين الدول العربية...وتراثها وتاريخها...أو متخيل يعنى ايه رئيس أى دولة أساسا يفكر بالشكل ده...وكمان بشكل علني ؟؟!!
الرادع الوحيد للسيسي انه يحتل جارته ويسرق مواردها...ان "أمه نصحته مايطمعش في اللى في ايد الناس"...
(ده بغض النظر عن انه مش قادر يخلص مع شوية عصابات في سينا..وكان هايتقطع فى ليبيا)...
_________
3- نرجع لنفس الجملة بتاعة أمه..ونشوف بقيتها:
"ماتطمعش في اللي في ايد الناس..حتى لو كان اللي في ايد الناس ده والدك..ودايما اطمع في اللي بيدى للناس.."
حد عنده تفسير ازاى مايطمعش فى والده اللى فى ايد الناس ؟؟؟!!!
حد عنده تفسير ازاى يطمع في اللى بيدى للناس ؟؟؟!!
smile رمز تعبيري
الأغلب ان قصده انه مايطمعش فى اللى فى ايد حد..حتى لو كان الحد ده والده..
بس في الحالة دى الراجل ده يبقى عنده عطل رهيب في "الفلاتر" والقدرات العقلية والتوافق العصبي...
_________
4- الناس اتتريقوا على الراجل اللى كان عايز يتكلم والسيسي سكته وقال له: أنا مأذنتش لحد انه يتكلم..
وماأذنش لحد يتكلم لحد نهاية "الحوار" اللى كان اسمه المفروض "لقاء الأسرة المصرية"..
اللى كتير ماخدوش بالهم منه ان الإرسال اتقطع مباشرة بعد ما السيسي سكت الراجل..وصفاء حجازى رئيس قطاع الأخبار صرحت ان قطع الإرسال مش من عندهم..لكن من عند الرئاسة..اللى ماستحملتش ان حد يفتح بقه حتى لو كان من "أراجوزات السيسي"...
ده بييجى فى نفس الوقت اللى بيقول فيه عبارات من نوعية:
"غيرتكم على بلدكم وخوفكم عليها أمر يسعدني ويسعد أي وطني، والغيرة دي أنا محتاج أصوبها وأقول نغير إزاي، ونغير إمتى».
(عايز يتحكم لوحده فى المشاعر الوطنية... smile رمز تعبيري ..وكيفيتها وتوقيتها)...
"تقدم مصر ليس بحرية التعبير..نضع أساسًا لدولة ديمقراطية حديثة بكل ما تعنيه هذه الكلمة»
(الاتنيييييييييييييييييييييييييييييييييييييين؟؟!! )
_________
5- السيسي قال نصاً فى خطابه انه بادر بنفسه بطرح موضوع صنافير وتيران من غير ما السعودية تطالبه بيها: "لا حد كان سألنا عليها ولا حد اتكلم عليها ولا حد طالب بيها خلال الفترة دي»!!!!!
_________
6- "سألت كل أجهزة الدولة الخارجية والدفاع والمخابرات وأرشيفها السري هل لديكم شيء يثبت ملكية مصر للجزيرتين؟ قالوا لا.. الورق المقدم من أجهزة الدولة بيؤكد ملكية السعودية"...
لما الشخص اللى المفروض رئيس جمهورية يقول ان كل أجهزة الدولة بما فيها "الأرشيف السري" ماعندهاش ما يثبت ملكية مصر للجزيرتين..وكمان عندها ما يؤكد ملكية السعودية..
ويتضح العكس.. ان وثائق 250 سنة (العلنية) بتأكد ملكية مصر..
http://albedaiah.com/news/2016/04/13/111039
وانه مافيش وثائق بتأكد ملكية السعودية..
يبقى احنا عندنا ايه ؟
رئيس نصاب كذاب ؟
أجهزة منافقة ؟
أجهزة منعدمة الكفاءة ؟
كل ده مع بعضه ؟؟!!
___________
7- السيسي رجع يعيد ويزيد فى انه حذر مرسي...وانه قدم له أكتر من مرة "تقدير موقف"..وان مرسي ماسمعش كلامه..وان ده استمر لحد 3 يوليو 2013..وبالتالى كان واجب عليه انه يتدخل لإنقاذ البلد..
السيسي بيذكر الكلام ده على انه بطولة منه..ومافيش فى دماغه ولا دماغ المؤسسة العسكرية بتاعته..أى مؤشرات حتى هذه اللحظة انه مقتنع ان دور المؤسسة العسكرية يقتصر على حماية حدود الوطن و"الإنصياع" لما يراه رئيس الجمهورية "المدني" باعتباره القائد الأعلى للقوات المسلحة..
على العكس..بيعتبر ان هيمنة المؤسسة العسكرية على سياسات الدولة الداخلية والخارجية حق وواجب..
هانسيبنا من ده..
وهانسيبنا كمان من انه كان بيعظم لمبارك ومايستجريش ولا هو ولا كل المجلس العسكري بتاعه يراجعوه فى قرار..
لكن انت ازاى يا بني آدم..تقدم تقدير موقف لجاسوس إرهابي خاين...؟؟!!!
ولا كنت بتقدم له تقدير موقف مضلل ؟؟!!
ولا انت وانت مدير مخابرات حربية ووزير دفاع لحد 3 يوليو 2013 ماكنتش تعرف انه جاسوس وإرهابي ومتخابر ؟؟؟!!!
وازاى فى خطبتك الطويلة العريضة دى كلها ماذكرتش انه إرهابي خاين متخابر ؟؟!!
امال العبيد بتوعك ازاى بيستحلوا دمه ودم كل اللى بيأيده ؟؟!!
__________
8- رجع السيسي يردد ان لينا شاب مختفى في ايطاليا اسمه عادل...بس المرة دى فى حديث للشعب المصري..مش للإيطاليين...
وده دليل آخر على سفهه..
لما قالها للإيطاليين..كانت مفهومة (وإن كانت غبية)...على أساس "لا تعايرنى ولا أعايرك..الهم طايلني وطايلك.."
انما لما يقول ده للمصريين اللى شايفين ايطاليا ازاى عاملة زى الغول على مواطنها..
عايز تقول ايه للمصريين طيب عن موقفك "العدمي" ازاء اختفاء مواطن مصري هناك..
(سيبك من انه استحالة يكون اتقتل على ايد جهات أمنية عذبته هناك زى ما حصل عندك..وهو ده مربط الفرس فى بهدلة ايطاليا ليك..)
__________
9- السيسي بيشير لوسائل التواصل الإجتماعي على انها السبب فى تعقد جريمة ريجيني وان الإعلام بياخد مصادره منها..
ده على أساس يعنى ان ايطاليا يعني بانية اتهاماتها على اساس بوستات فى الفيس بوك أو تويتات..
مش على أساس تشريح الجثة..وسجلك المشرف فى التعذيب والإخفاء القسري...وتصنتها على مكالمات الشرطة بتاعتك عن طريق شركة ايطالية انت كنت أصلا جايبها للتجسس على مواطنيك ؟؟؟!!!
ولا على أساس ان وسائل التواصل الإجتماعي هى اللى صفت 5 مواطنين فى الشارع وادعت انها لقت أوراق ريجيني معاهم ؟؟!!!
الدور اللى بتلعبه وسائل التواصل الإجتماعي بس هو انها "بتفضحك" وبتنشر فضايحك على مواطنين كان اللى زيك زمان بيقرطسوهم بقناة تليفزيونية حكومية واذاعة صوت العرب...
السيسي متصور هو و"كتايبه" ان وسائل التواصل الإجتماعي ممكن تبقى وسيلة ل"تأليف خرافات"...وده بيبقى واضح جدا فى بوستات "لجانه العسكرية" اللى تنزل بوست مثلا عن "عبقرية التنازل عن صنافير وتيران لضرب اسرائيل" وتلاقى 15 ألف "عسكري" مشييرينها...
_________
10- "فيه ناس بتركب الميكروباصات والأوتوبيسات علشان تشكك فى الإنجازات"
(دعوة جديدة لاقتتال المواطنين..وان الناس تفتك بكل من يعارضه في وسائل النقل العام باعتباره عميل مأجور خاين...أعداء الوطن مجندينه للطعن فى انجاز خيالى وهمي مش موجود إلا فى خطبه..)
_________
11- الكذب الفاجر...
«اللي أنا عملته لحد دلوقتي ميتعملش في 20 سنة»
«اوعوا الاستقرار والأمن اللي إنتوا شايفينه ينسيكوا التحديات اللي قدامنا»...
"الأسعار مش هاترتفع وده وعد.."
"مكافحة الإرهاب تتحسن يومياً في سيناء"..
هل فيه حد في بر مصر من شرقها لغربها..من شمالها لجنوبها..ممكن يصدق ان فيه انجازات فى البلد أصلاً..ناهيك عن انجازات ماتتعملش في 20 سنة ؟؟؟!!!
هل فيه حد في بر مصر شايف استقرار وأمن..مع انهيار السياحة وارتفاع سعر الدولار والغلاء وغيره وغيره؟؟!!!
هل فيه حد نسي انه قال ان الأسعار هاتنخفض فى ديسمبر اللى فات...وده برضه وعد ؟؟!!
هل فيه حد مابيشوفش جنازات العساكر والظباط فى سينا ؟ أو ماعرفش بضرب السياحة فى سينا ؟ أو ماسمعش عن الكماين اللى بتتضرب بشكل مستمر هناك ؟؟!!!
وبعدين يفقعنا السؤال المتين: ليه الناس مش حاسة بالإنجاز..
وكأن المشكلة فينا احنا !!!!!

لما يقول: "ماتسمعوش لحد غيري...ماتصدقوش النت...ماتصدقوش حد تاني.." هو بيحاول يطبق نظريات مخابراتية قديمة اتعلمها على ايدين اللواءات التعبانين اللى بيستضيفوهم فى التليفزيونات المخروبة على انهم خبراء استراتيجيين..نظريات الإقناع والتصديق بالإيحاء..
لما يوحي للناس ان فيه انجازات ونجاح...الناس تحت تأثير "كاريزمته الخلابة" هايتنوموا مغناطيسيا ويصدقوا فعلا انهم فى رخاء ورفاهية..
طبعا النظريات دى اتضربت بالنار دلوقتى ومكانها المتاحف..

Yasser Negm

نرحب دائماً بالنقاشات المجدية والتعليقات التي تغني موضوعاتها ،

أنشر الموضوع ليعلم الناس الحقائق وكن أنت الآعلام البديل